Praktiketako memoria amaituta!!

Aste Santuko oporrei hasiera bikaina emateko praktiketa memoria gainetik kendu dut. Imagina ezina zirudien, baina azkenean heldu da eguna.

Atzo igo nuen Moodletics-era. Ez dakit ondo ala txarto igo nuen, baina nire mentoreak badauka kopia bat badazpada.

Gaur, Master Amaierako Lanarekin (MAL) hasi naiz. Beste amesgaiztotxo bat. Hau ere IKTen ingurukoa da, blogen ingurukoa hain zuzen ere. Aurrerago MALari buruz berri ematen saiatuko naiz, orain hondartzara edo futbol partidu bat prestatzera noa! Batek daki! Orain "oporretan" baitnago...

Ondo izan!!

Memoriaren azken ukituak egiteko prest!

Azkenean, praktiketako memoria (amaitezina) amaitu dut. Idatzi behar nuena idatzi dut, esan behar nuena hamaika bider errepikatu dut. Baina azkenean amaitu dudala uste dut.

Bakar-bakarrik azken ukitu batzuk falta zaizkit:

1. Hizkuntza formala eta egokian idatzia izatea. Egia esan, ez dakit nola birmolda dezakeedan hori. Saitu egiten naiz hizkuntza egoki baten idazten, baina uste dut  nire idazteko era naturalak saiakera horiek ezabatzen dituela.
2. Eranskinak. Bai, memoriaren erdia eranskinak dira, eta hauek word-era pasatu, atondu eta txukundu behar ditut memorian erantsi baino lehen.
3. Itxura. EHUtik memoriaren itxura zehaztua dago. Azala, aurkibidea, letra tipo eta tamaina, orrialdeen zenbaketa, marginak,... dena! Beraz, guzti horrek ere bere garrantzia duenez denbora eman beharko diot.

Baina, hala ere, nola edo hala, memoriaren pisurik handiena gainetik kendu dudala sentitzen dut. Azken ukituak memoria bezain astunak izan arren.

Ebaluaketa eta prosa bideratuan murgiltzera!

Heldu da praktiketako memoria amaitzen saiatu eta ikasleen lanak ebaluatzeko garaia. Praktikak amaitu zitzaizkidan joan den astean eta III. moduloan astebete daramat.

Alde batetik, ikasleen lan guztiak objektiboki zuzendu eta ebaluatu behar ditut, haien 3. ebaluaketako puntu bat joakoan dagoelako. Guztiek ez dute berdin parte hartu, batzuk parte hartu ere ez dute egin eta! Batzuek lan txukunak idatzi eta sortu dituzte, beste batzuek ez hainbeste (nahi ez zutelako gehien bat). Esperientzi polita izan da, zenbaitetan gogorra; baina orokorrean ona! Orain, irakasle izatearen alderik itsusienean sartzeko garaia heldu zait: zuzenketak eta ebaluaketak.

Bestetik, praktiketan egindako guztia 15-40 orrialdetan batu behar dut. Baina zelako 15-40 orrialde! Dena gomendatutako luzerarekin eta ordenarekin zehaztua dago. Idatzi eta idatzi nabil, baina gaur amaitzen baldin badut nire praktiketako tutoreari igorri behar diot pixkat "zuzendu" dezan.

Beraz, banoa berriro ebaluaketa eta prosa bideratuan murgiltzera!